பழைய பொருட்கள் : நம் வாழ்வியலின் பாடம்
பழைய பொருட்கள் : நம் வாழ்வியலின் பாடம்
திருச்சி புத்தூர் பகுதியில் இல்லத்திலேயே புழங்கு பொருட்கள் காட்சியகத்தினை அமைத்து வரலாற்றை எடுத்துரைத்து வருகிறார் சமூக செயற்பாட்டாளர் யோகா ஆசிரியர் விஜயகுமார். காட்சியகத்தை சங்ககால நாணயங்கள் சேகரிப்பாளர்கள் முகமது சுபேர் லட்சுமி நாராயணன் சுடுமண் பொருட்கள் சேகரிப்பாளர் சந்திரசேகரன் உள்ளிட்டோர் பார்வையிட்டனர். காட்சியகம் குறித்து சமூக செயற்பாட்டாளர் யோகா ஆசிரியர் விஜயகுமார் பேசுகையில், பழைய பொருட்கள் என்பவை வெறும் பயன்பாடு முடிந்த பொருட்கள் அல்ல. அவை நம் முன்னோர்களின் வாழ்க்கை முறை, பண்பாடு, தொழில்நுட்ப அறிவு, உழைப்பு, சிக்கனம், இயற்கையோடு இணைந்த வாழ்வு ஆகியவற்றை எடுத்துரைக்கும் வரலாற்றுச் சான்றுகளாகும். இன்றைய நவீன உலகில் பல பொருட்கள் சில ஆண்டுகளிலேயே மறைந்து விடுகின்றன.
ஆனால் நம் முன்னோர்கள் பயன்படுத்திய மண்பானை, செம்புப் பாத்திரம், மரப்பெட்டி, உரல்–உலக்கை, அம்மிக்கல், திருகை கல், முறம், கூடை, பழைய விளக்குகள், விவசாயக் கருவிகள், பாரம்பரிய விளையாட்டுப் பொருட்கள் போன்றவை அவர்களின் அன்றாட வாழ்வை நமக்கு கண்முன்னே கொண்டு வருகின்றன. “ஒரு பொருளை அறிந்தால், அந்தப் பொருளைப் பயன்படுத்திய மனிதனின் வாழ்க்கையை அறியலாம்” என்ற வகையில், ஒவ்வொரு பழைய பொருளுக்கும் ஒரு வரலாறு உண்டு. ஒரு மண்பானை அன்றைய சமையல் முறையைச் சொல்கிறது. ஒரு விவசாயக் கருவி உழவுத் தொழிலின் வளர்ச்சியை எடுத்துக்காட்டுகிறது பழைய விளையாட்டுப் பொருட்கள் குழந்தைகளின் பொழுதுபோக்கையும் சமூக உறவுகளையும் நினைவூட்டுகின்றன. பழைய பொருட்கள் நமக்கு சிக்கனத்தையும், நீடித்த பயன்பாட்டையும் கற்றுத் தருகின்றன. உடைந்த பொருளைத் தூக்கி எறிவதற்குப் பதிலாக அதைச் சீரமைத்து மீண்டும் பயன்படுத்தியவர்கள் நம் முன்னோர்கள். இயற்கைப் பொருட்களை அதிகம் பயன்படுத்தியதால் சுற்றுச்சூழல் பாதிப்பும் குறைவாக இருந்தது. இத்தகைய பொருட்களைப் பாதுகாப்பது என்பது கடந்த காலத்தை மட்டும் பாதுகாப்பதல்ல; நமது எதிர்காலத் தலைமுறைக்கு நமது அடையாளத்தைப் பாதுகாத்து வழங்குவதாகும். பள்ளி மாணவர்கள், இளைஞர்கள், ஆய்வாளர்கள் ஆகியோர் பழைய பொருட்களை நேரில் பார்வையிட்டு அவற்றின் பயன்பாடு மற்றும் வரலாற்றை அறிந்து கொள்ள வேண்டும். ஒவ்வொரு வீட்டிலும் பயன்பாடின்றி இருக்கும் பழைய பொருட்களை அழித்துவிடாமல், அவற்றை பாதுகாத்து பாரம்பரியப் பொருட்கள் காட்சியகங்களுக்கு வழங்குவது ஒரு சிறந்த பணியாகும். ஒரு தலைமுறையின் நினைவுப் பொருள், அடுத்த தலைமுறைக்கு வரலாற்றுப் பாடமாக மாறும். பழைய பொருட்கள் பேசுவதில்லை; ஆனால் அவற்றின் வரலாறு நம்மிடம் பல கதைகளைப் பேசுகிறது. அவற்றைப் பாதுகாப்போம் – நம் பாரம்பரியத்தையும், தமிழர் வாழ்வியலையும் பாதுகாப்போம் என்றார்.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
