நூலகமும் புழங்கு பொருட்கள் காட்சியகமும், தமிழர் கலாச்சாரத்தின் இரு கண்கள் : சமூகப் பணித்துறை மாணவர்களுக்கு விளக்கிய சமூக செயற்பாட்டாளர்
நூலகமும் புழங்கு பொருட்கள் காட்சியகமும், தமிழர் கலாச்சாரத்தின் இரு கண்கள் : சமூகப் பணித்துறை மாணவர்களுக்கு விளக்கிய சமூக செயற்பாட்டாளர்
தமிழர் அறிவு, பண்பாடு மற்றும் பாரம்பரியத்தை எடுத்துரைக்கும் வகையில் திருச்சி அமிர்தம் சமூக சேவை அறக்கட்டளை நிர்வாக அறங்காவலர் யோகா ஆசிரியர் விஜயகுமார் தன் இல்லத்திலேயே அறிவார்ந்த சமூகத்திற்கு இலவச நூலகமும், பாரம்பரியம் காக்க புழங்கு பொருட்கள் காட்சியகமும் அமைத்துள்ளார். நூலகத்தையும் புழங்கு பொருட்கள் காட்சியகத்தையும் முதுகலை சமூகப் பணித்துறை மாணவ, மாணவிகள் பணிப் பயிற்சிக்காக பார்வையிட்டனர். நூலகம் மற்றும் புழங்கு பொருட்கள் காட்சியகம் குறித்து அமிர்தம் சமூக சேவை அறக்கட்டளை நிர்வாக அறங்காவலர் யோகா ஆசிரியர் விஜயகுமார் பேசுகையில், உலகின் தொன்மையான நாகரிக இனங்களில் தமிழினம் முக்கிய இடத்தைப் பெற்றுள்ளது. மொழி, இலக்கியம், கலை, கட்டிடக்கலை, வேளாண்மை, மருத்துவம், வணிகம் மற்றும் வாழ்வியல் பண்பாடு என பல துறைகளில் தமிழர்கள் தனித்துவமான அடையாளத்தை உருவாக்கியுள்ளனர். இந்த வரலாற்றுப் பெருமையைப் பாதுகாத்து அடுத்த தலைமுறைக்கு எடுத்துச் செல்லும் பொறுப்பு நமது காலத்தின் மிக முக்கியமான கடமையாகும். தமிழர் பண்பாட்டின் அடையாளங்களை பாதுகாக்கும் இரண்டு முக்கிய நிறுவனங்கள் நூலகமும் புழங்கு பொருட்கள் காட்சியகமும் ஆகும். நூலகம் தமிழரின் அறிவு மரபைப் பாதுகாக்கிறது, புழங்கு பொருட்கள் காட்சியகம் தமிழரின் வாழ்வியல் மரபைப் பாதுகாக்கிறது. இவை இரண்டும் இணைந்து தமிழர் கலாச்சாரத்தின் இரு கண்களாக விளங்குகின்றன. நூலகம், அறிவை சேமிக்கிறது. அறிவை பகிர்கிறது. சிந்தனையை வளர்க்கிறது. சமூக முன்னேற்றத்தை ஊக்குவிக்கிறது. தமிழ் நூல்கள், சங்க இலக்கியங்கள், வரலாற்று ஆவணங்கள், ஆய்வு நூல்கள் மற்றும் பண்பாட்டு பதிவுகள் அனைத்தும் நூலகங்களின் வழியே தலைமுறைகளை சென்றடைகின்றன. தமிழ் இலக்கியப் பாரம்பரியத்தின் பாதுகாப்பு தமிழ் மொழியின் பெருமை அதன் இலக்கியச் செல்வத்தில் அடங்கியுள்ளது. சங்க இலக்கியங்கள் முதல் நவீன இலக்கியங்கள் வரை ஆயிரக்கணக்கான நூல்கள் தமிழர் சிந்தனையின் வரலாற்றுப் பதிவுகளாக உள்ளன. நூலகத்திலுள்ள நூல்கள் வாசிப்பு கலாச்சாரத்தை வளர்க்கின்றன. தமிழ் மொழியை அடுத்த தலைமுறைக்கு எடுத்துச் செல்கின்றன. ஆய்வாளர்களுக்கு ஆதாரங்களை வழங்குகின்றன. எனவே நூலகம் என்பது புத்தகங்கள் இருக்கும் இடம் மட்டுமல்ல; அது தமிழ் நாகரிகத்தின் நினைவுக் களஞ்சியம் ஆகும். புத்தகங்கள் எழுத்து வடிவில் வரலாற்றைப் பதிவு செய்கின்றன. புழங்கு பொருட்கள் வாழ்வியல் வடிவில் வரலாற்றைப் பதிவு செய்கின்றன. முன்னோர்கள் பயன்படுத்திய அம்மி, ஆட்டுக்கல், உரல், உலக்கை, மரக்கால், நாழி, உழக்கு, வேளாண் கருவிகள், இசைக்கருவிகள், குத்துவிளக்குகள், நாணயங்கள் ஆகியவை ஒரு காலத்தின் வாழ்க்கை முறையை எடுத்துரைக்கும் வரலாற்றுச் சான்றுகளாகும். தமிழர் வாழ்வியல், தமிழர் நாகரிகம் உழவுத் தொழிலை அடிப்படையாகக் கொண்டது. கலப்பை, ஏர், மண்வெட்டி போன்ற கருவிகள் தமிழர்களின் உழைப்பையும் தொழில்நுட்ப அறிவையும் வெளிப்படுத்துகின்றன என்றார்.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
